ఆసీస్ తో మ్యాచ్ కోసం టీమ్ఇండియా సన్నద్దమవుతోంది. ఈ క్రమంలో నెట్స్లో బ్యాటింగ్ ప్రాక్టీస్ చేస్తున్న హార్దిక్ పాండ్య కుడి చేతి వేలికి గాయమైనట్లు వార్తలు వస్తున్నాయి. అతడికి అయిన గాయం గురించి పెద్దగా ఆందోళన చెందాల్సిన అవసరం లేదని అంటున్నారు. అయితే.. ఆ తరువాత హార్దిక్ బ్యాటింగ్ చేయలేకపోయాడని అంటున్నారు. దీనిపై బీసీసీఐ ఇప్పటి వరకు స్పందించలేదు. ఒకవేళ ఆసీస్తో మ్యాచ్ సమయానికి హార్దిక్ కోలుకోలేకపోతే టీమ్ఇండియాకు కష్టాలు తప్పవు.
అనారోగ్యం బారిన గిల్..
యువ ఓపెనర్ శుభ్మన్ గిల్ అనారోగ్యం బారిన పడినట్లు భారత క్రికెట్ కంట్రోల్ బోర్డు తెలియజేసింది. అయితే.. అతడికి ఏమైంది అన్న విషయాన్ని మాత్రం చెప్పలేదు. అందుకున్న సమాచారం ప్రకారం గిల్ డెంగ్యూ బారిన పడినట్లు తెలుస్తోంది. దీంతో ఆసీస్తో మ్యాచ్కు అతడు అందుబాటులో ఉండడం అనుమానమే. సాధారణంగా డెంగ్యూ నుంచి కోలుకునేందుకు వారం నుంచి పది రోజుల సమయం పడుతుంది. దీంతో గిల్ పాకిస్తాన్తో జరిగే మ్యాచ్ వరకు అందుబాటులో ఉండకపోవచ్చు.
ఆసీస్తో మ్యాచ్కు గిల్ దాదాపుగా దూరం అయినట్లే. దీంతో అతడి స్థానంలో ఇషాన్ కిషన్ ఓపెనర్గా బరిలోకి దిగొచ్చు. రోహిత్తో కలిసి ఇషాన్ ఇన్నింగ్స్ను ఆరంభించే అవకాశాలు ఉన్నాయి. ప్రస్తుతం గిల్ వైద్యుల పర్యవేక్షణల్లో ఉన్నట్లు భారత హెడ్ కోచ్ రాహుల్ ద్రవిడ్ చెప్పాడు. అతడు త్వరలోనే కోలుకుంటాడని, వైద్యులు ఏం చెబుతారో వేచి చూడాలని అని, గిల్ ఆసీస్తో మ్యాచ్లో ఆడతాడా లేదా అనే దానిపై శనివారం నిర్ణయం తీసుకుంటామన్నాడు.
