విశాఖపట్నం, అక్టోబర్ 25: రాజధాని తరలింపు ప్రభుత్వ ప్రధాన కార్యదర్శి కె.ఎస్. జవహర్ రెడ్డి కీలక వ్యాఖ్యలు చేశారు. ప్రస్తుతం జరుగుతోంది రాజధాని షిఫ్టింగ్ ఎంతమాత్రమూ కాదన్నారు. అసలు రాజధాని షిఫ్టింగ్ అని ఎవరు చెప్పారు? ఉత్తరాంధ్ర అభివృద్ది గురించి ఒక కమిటీ ని వేశాం, ఆ కమిటీ నివేదిక ఇచ్చిన తర్వాత తదుపరి చర్యలు ఉంటాయన్నారు ఆంధ్ర ప్రదేశ్ ప్రభుత్వ ప్రధాన కార్యదర్శి జవహర్ రెడ్డి.
జీవో నెంబర్ 2015 పేరుతో ఇటీవల రాష్ట్ర ప్రభుత్వం విడుదల చేసిన ఉత్తర్వులలో చాలా స్పష్టంగా పేర్కొంది. ఏంటంటే రాష్ట్రంలోనే పూర్తిగా వెనుకబడిన ప్రాంతాల్లో ఉత్తరాంధ్రకు సంబంధించిన అనేక ప్రాంతాలున్నాయి, ప్రధానంగా శ్రీకాకుళం విజయనగరం తో పాటు విశాఖ ఏజెన్సీలో మరింత అభివృద్ధి జరగాల్సిన అవసరం ఉందనీ గతంలో నీతి అయోగ్ వెనకబడిన జిల్లాలను ప్రతిపాదించిన సమయంలో కూడా ఉత్తరాంధ్ర ప్రాంతానికి సంబంధించి కొన్నాళ్లపాటు నిధులు కూడా విడుదలయ్యాయి. ఆ మేరకు అభివృద్ధి జరగకపోవడంతో ఉత్తరాంధ్ర అభివృద్ది మీద ప్రత్యేకంగా దృష్టి పెట్టాలని రాష్ట్ర ప్రభుత్వం భావిస్తోంది.
ఆ కమిటీలో ముగ్గురు సీనియర్ అధికారులని సభ్యులుగా నియమించారు. పట్టణాభివృద్ధి శాఖ ప్రత్యేక ప్రధాన కార్యదర్శి శ్రీలక్ష్మి ఆధ్వర్యంలో, ఆర్థిక శాఖ స్పెషల్ చీఫ్ సెక్రటరీ ఎస్ఎస్ రావత్, అలాగే సాధారణ పరిపాలన శాఖ కార్యదర్శి పోలా భాస్కర్ ని సభ్యులుగా నియమిస్తూ కమిటీ ఏర్పాటయింది. ఈ కమిటీ ఓ విడత విశాఖ లో పర్యటించి, జిల్లా అధికారులతో కూడా సమీక్షా సమావేశం కూడా నిర్వహించారు. ఆ సమయంలో ప్రధానంగా సీఎం ఇక్కడకు వస్తే ఉండడానికి ముఖ్యమంత్రి క్యాంప్ కార్యాలయం తో పాటు దాదాపు 10 నుంచి 15 లక్షల చదరపు అడుగుల అధికారిక వ్యవహారాల స్పేస్, 1500 వరకు వివిధ రకాల నివాస గృహాలకు సంబందించిన సమాచారాన్ని కూడా జిల్లా యంత్రాంగం అందించింది.
రాజధాని కి సంబందించిన న్యాయ వివాదాలు ప్రస్తుతం సుప్రీం కోర్టు లో పెండింగ్ లో ఉన్నాయి. ఈ వ్యాజ్యం పై డిసెంబర్ లో విచారణ, వాదనలు జరగనున్నాయి. ఈ నేపథ్యంలో ప్రస్తుతం రాజధాని కి సంబందించి ప్రభుత్వం ఎలాంటి నిర్ణయం తీసుకోలేదు. కానీ సీఎం క్యాంప్ ఆఫీస్ ను మాత్రం షిఫ్ట్ చేసే వెసులుబాటు రాష్ట్ర ప్రభుత్వానికి ఉంది. ముఖ్యమంత్రి రాష్ట్రం లో ఎక్కడైనా నివాసం ఉండొచ్చు.
ఈ నేపథ్యంలో ప్రస్తుతం జరుగుతున్న ఏర్పాట్లు రాజధాని మార్పుకు సంబంధించినవి ఎంత మాత్రం కాదంటూ సీ ఎస్ ఇచ్చిన వివరణ పై మరొకసారి రాష్ట్ర వ్యాప్త చర్చ కు తెరలేపినట్టైంది.